બાળપણ.

સાંજ પડે સૂરજ ઢળે,
ગાયોનાં ધણ પાછા વળે..મને બાળપણ યાદ આવે,

થઈ ભેગાં કરતાં કુંડાળું
ચોકમાં વ્હાલનું થતું વાળુ....મને બાળપણ યાદ આવે,

કૂવાનાં કઠોડે વાટ જોતી
સહિયરની યાદોને સંજોતી....મને બાળપણ યાદ આવે,

વિરડાનાં પાણીને આછરતી
ખોબે ખોબે ઍને ભરતી.......મને બાળપણ યાદ આવે,

ચોકે થાતી ફાનસની બત્તી
સમેટાઈ જાતી ઘરમાં વસ્તી....મને બાળપણ યાદ આવે,

સાંજ પડે વાટ જોતાં માડીનાં નેણ
મીઠો ઠપકો આપતાં બે વેણ....મને બાળપણ યાદ આવે,

ઓટલે રમતાં રંગીન પાંચીકા
બની જતાં કેવાં નાનાં કીકા...મને બાળપણ યાદ આવે,

વાગે ઝાલર થાય આરતી
મૂકી રમત હું મંદિરે ભાગતી....મને બાળપણ યાદ આવે.